🏘️ O Concello de Dodro informa das novas axudas do programa Fogar Vivo para mobilizar vivendas en alugueiro

27/02/2026

🏘️ O Concello de Dodro informa das novas axudas do programa Fogar Vivo para mobilizar vivendas en alugueiro

O Concello de Dodro informa á veciñanza da publicación no Diario Oficial de Galicia da Resolución do 24 de febreiro de 2026 pola que se establecen as bases reguladoras das axudas do programa Fogar Vivo para o ano 2026, impulsado polo Instituto Galego da Vivenda e Solo (IGVS)



Este programa ten como obxectivo fomentar a posta no mercado de alugueiro de vivendas baleiras a prezos accesibles, facilitando o acceso á vivenda e contribuíndo á dinamización do noso concello.

______________

🔹 Que axudas se poden solicitar?

O programa contempla tres liñas principais de axuda:

1️⃣ Axudas para seguros de alugueiro

• Ata 3.000 € por vivenda para cubrir seguros de impago de rendas e/ou seguros multirrisco do fogar.

2️⃣ Axudas para adecuación e reparación da vivenda

• Ata 11.000 € segundo o investimento realizado.

• Subvención do 80 % do gasto xustificado na parte base.

• Inclúe obras de conservación, rehabilitación, melloras de habitabilidade, cambio de sanitarios, mobiliario de cociña e electrodomésticos, entre outras actuacións.

3️⃣ Axuda adicional de 2.000 €

•No caso de que a vivenda se alugue a menores de 36 anos, familias con menores ao seu cargo ou persoas dependentes con discapacidade recoñecida.

💰 A contía máxima total pode acadar os 16.000 € por vivenda.

______________

🔹 Requisitos principais

As vivendas deben:

• Estar situadas en Galicia.

• Ser de titularidade privada.

• Estar baleiras nos tres meses anteriores á solicitude (con excepcións previstas na norma).

• Destinarse ao alugueiro como vivenda habitual.

• Manterse no programa durante un período mínimo de 5 ou 7 anos (segundo sexa persoa física ou xurídica).

No caso do Concello de Dodro, o límite máximo da renda mensual de alugueiro será de 450 €, ao estar incluído na Zona 5 (resto dos concellos de Galicia)

______________

🔹 Como se solicitan?

As solicitudes deberán presentarse preferiblemente por vía electrónica a través da sede electrónica da Xunta de Galicia, empregando os procedementos:

• VI426F (axudas para reparación e adecuación)

• VI426H (axudas para seguros e axuda vinculada)

A concesión realizarase por orde de entrada das solicitudes completas ata esgotar o crédito dispoñible.

______________

📍 Información e asesoramento

O Concello de Dodro anima ás persoas propietarias de vivendas baleiras a informarse sobre esta oportunidade para:

✔ Poñer en valor os seus inmobles

✔ Garantir seguridade no cobro das rendas

✔ Contribuír a facilitar o acceso á vivenda no municipio

Para máis información, as persoas interesadas poden dirixirse ás oficinas municipais ou consultar a publicación oficial no DOG do 27 de febreiro de 2026